Monday, April 23, 2018

Mwili wa Agnes ‘Masogange’ ulivyowasili nyumbani kwao

Mwili wa Agnes Gerald ‘Masogange” tayari umewasili nyumbani kwao eneo la Utengule-Mbalizi mkoani Mbeya.

Thursday, April 19, 2018

Meneja wa Fedha wa Mamlaka ya Bandari Tanzania (TPA) afikishwa Mahakamani kwa kumiliki Nyumba 23, Magari 7

Leo April 19, 2018 Meneja wa Fedha wa Mamlaka ya Bandari Tanzania (TPA), Prosper Kimaro amefikishwa katika Mahakama ya Hakimu Mkazi Kisutu akikabiliwa na kosa la kujilimbikizia mali zenye thamani ya Shilingi Bilioni 1.4 zisizolingana na kipato chake halali.

Kimaro anadaiwa kumiliki nyumba zenye thamani ya Bilioni 1,178,370,334, zilizopo maeneo ya Temeke DSM na magari 7 yenye thamani Shilingi Milioni 307,364,678.20.

Kimaro amesomewa mashtaka yake na wakili wa serikali, Vitalis Peter mbele ya Hakimu Mkazi Mkuu, Thomas Simba ambapo amedai kuwa mshtakiwa anakabiliwa na kosa moja.

Wakili Vitalis amedai mshtakiwa anakabiliwa na kosa la kujilimbikizia mali zisizolingana na kipato chake ambapo anadaiwa amelitenda kosa hilo kwa miaka tofauti kati ya 2012 na 2016.

Anadaiwa mali hizo amejilimbikizia maeneo ya Temeke DSM akiwa mtumishi wa umma wa TPA kama Meneja wa Fedha, amekutwa na mali zisizolingana na kipato chake halali cha zamani na cha sasa.

Mali hizo ni nyumba 2 zilizopo mtaa wa Uwazi Temeke (Mil 124.2), kiwanja kimoja kilichopo Yombo Vituka (Mil.12.9), nyumba 2 zilizopo Temeke (Mil 63.5).

Pia nyumba nyingine 3 zilizopo Temeke zenye thamani ya (Mil.159), nyumba nyingine 3 zilizopo maeneo hayo (Mil 170.1), nyumba nyingine moja (Mil 71.3).

Pia ana kiwanja Temeke (Mil 35), kiwanja kingine (Mil 25) na kujenga nyumba 3 (Mil 159), pia nyumba nyingine moja (Mil 106), pia nyumba nyingine 3 zilizopo Temeke zikiwa na thamani ya (Mil 214).

Pia ana nyumba 4 zilizopo Viziwa Ziwa Kibaha Mjini (Mil 199.7), nyumba nyingine Kilimahewa Tandika (Mil 70).

Pia anamiliki magari aina ya Toyota Land cruise (Mil 180.1), Mitsubishi (Mil 38.4), Massey Ferguson (Mil.24), Trailer (Mil 4.5), Toyota Harrier (Mil 35.8), Trailer (Mil 4.8), Massey Ferguson (Mil 19.1).

Baada ya kusomewa mashtaka hayo, mshtakiwa alikana makosa yake ambapo Wakili Vitalis amedai upelelezi wa kesi hiyo haujakamilika, pia hana pingamizi na dhamana.

Hakimu Simba ametoa masharti ya dhamana kwa mshtakiwa kuwa na wadhamini 2 watakaowasilisha hati ya mali isiyohamishika yenye thamani ya Sh.Mil 200, pia mshtakiwa asitoke nje ya mkoa wa Dar es Salaam bila kibali pamoja na kuwasilisha hati zake za kusafiria.

Mshtakiwa huyo hajatimiza masharti ya dhamana, ambapo Hakimu Simba ameahirisha kesi hiyo hadi May 3,2018.

Rais Magufuli Awajulia Hali Wagonjwa Waliolazwa Katika Taasisi Ya Moyo Ya Jakaya Kikwete .......Awapongeza Madaktari Kwa Kazi Nzuri

Rais wa Jamhuri ya Muungano wa Tanzania Mhe. Dkt. John Pombe Magufuli amewapongeza madaktari na wauguzi wa Taasisi ya Moyo ya Jakaya Kikwete (JKCI) iliyopo Jijini Dar es Salaam kwa mafanikio makubwa iliyoyapata katika utoaji wa huduma za matibabu ya moyo.

Mhe. Rais Magufuli aliyeongozana na Mkewe Mhe. Mama Janeth Magufuli ametoa pongezi hizo hizo tarehe 18 Aprili, 2018 alipotembelea taasisi hiyo na kuwajulia hali wagonjwa wanaopatiwa matibabu akiwemo Waziri Mstaafu Dkt. Juma Ngasongwa.

Mhe. Rais Magufuli amesema JKCI ambayo imepata mafanikio katika matibabu ya moyo kwa njia ya upasuaji wa tundu dogo na kufungua kifua imesaidia kuokoa vifo kwa Watanzania wengi waliokuwa wanakosa uwezo wa kifedha wa kwenda kutibiwa nje ya nchi, imepunguza gharama za kutibiwa nje ya nchi na imeijengea heshima Tanzania.

“Prof. Janabi, madaktari wote na wauguzi wa taasisi hii nawapongeza sana kwa kazi nzuri mnayoifanya, natambua kuwa wapo baadhi ya waliokuwa wananufaika na wagonjwa kupelekwa nje ya nchi hawatafurahia kazi mnayoifanya lakini nyinyi chapeni kazi na Serikali ipo na nyinyi” amesisitiza Mhe. Rais Magufuli.

Mkurugenzi Mtendaji wa JKCI Prof. Mohamed Janabi amemshukuru Mhe. Rais Magufuli kwa kuitembelea taasisi hiyo na kuwatia moyo na ameahidi kuwa wataendelea kuchapa kazi kwa juhudi ili kuimarisha zaidi huduma za matibabu ya moyo.

Amefafanua kuwa JKCI imefanikiwa kupunguza idadi ya wagonjwa waliokuwa wanakwenda kutibiwa nje ya nchi kwa asilimia 83 na kwamba tangu mwaka 2015 idadi ya wagonjwa waliotibiwa katika taasisi hiyo ni zaidi ya 2,420 ambao wangehitaji wastani wa Shilingi Milioni 30 kwa kila mmoja kutibiwa nje ya nchi.

Kabla ya kutembelea JKCI Mhe. Rais Magufuli na Mkewe Mhe. Mama Janeth Magufuli wamekwenda Kariakoo Jijini hapa kutoa pole kwa Mkuu wa Mkoa wa Arusha Bw. Mrisho Gambo ambaye amefiwa na Mama yake Bi Rehema Paulo Mombuli, ambaye mwili wake unasafirishwa kwenda Arusha na baadaye Moshi mkoani Kilimanjaro kwa mazishi.

Gerson Msigwa
Mkurugenzi wa Mawasiliano ya Rais, IKULU
Dar es Salaam

Waliovunja kanisa na kuiba viti, vyombo vya muziki wakamatwa

Jeshi la Polisi Mkoa wa Mbeya limeendelea kukabiliana na vitendo vya uhalifu ili kuhakikisha kuwa wakazi wa Mkoa huu wanaendelea kuwa salama na mali zao. 

Aidha Jeshi la Polisi Mkoa wa Mbeya limeendelea na Misako na Doria za mara kwa mara ili kudhibiti vitendo vya uhalifu pamoja na kuzuia matukio mbalimbali yakiwemo ya uporaji na ukabaji. 

Jeshi la Polisi Mkoa wa Mbeya limeendesha Misako katika maeneo mbalimbali ya Mkoa wa Mbeya baada ya kupata taarifa za uwepo wa vitendo vya uhalifu wa kuvunja Makanisa nyakati za usiku na kuiba mali mbalimbali zilizomo katika Makanisa. 

Misako hii ilianza mnamo tarehe 31.03.2018 na ilifanyika katika maeneo mbalimbali ndani ya Jiji la Mbeya na katika Wilaya ya Rungwe ilifanyika maeneo ya Kiwira na Wilaya ya Mbarali ilifanyika katika maeneo ya Igurusi.

Katika Misako hiyo, watuhumiwa watatu walikamatwa kutokana na kuhusika katika matukio ya uvunjaji na kuiba Makanisani nyakati mbalimbali. Watuhumiwa hao ni:-
  1.  WILLIAM SANKE [23] Mkazi wa Isanga
  2. ELIUDI MWANSULE [28] Mkazi wa Mwakibete Viwandani
  3. NOA MOLELA [26] Mkazi wa Mama John
Baada ya kukamatwa na kuhojiwa, watuhumiwa walikiri kuhusika katika matukio ya kuvunja na kuiba Makanisani nyakati mbalimbali na mara baada ya kuiba mali hizo huwapelekea wauzaji ambao pia wamekamatwa. 
Watuhumiwa hao ni:-
  1. HURUMA JOHN [52] Mkazi wa Igurusi Wilaya ya Mbarali
  2. HALID MWANGOKA [37] Mkazi wa Igurusi Wilaya ya Mbarali
  3. GODFREY MWALIMBA [28] Mkazi wa Mwakibete
  4.  GWAMAKA MWAIKAMBO [32] Mkazi wa Mwakibete
Baada ya kuhojiwa watuhumiwa wote walikiri kupokea mali hizo kutoka kwa mtuhumiwa WILLIAM SANKE na wenzake na baada ya kuzipokea huziuza kwa watu mbalimbali.

Misako hii imefanikisha kupatikana kwa mali mbalimbali za wizi ambazo ni:-
  1.     Spika kubwa 15 za aina mbalimbali
  2.     Mixer 08
  3.     Amplifier 01
  4.     Viti vya Plastic 108 vya rangi mbalimbali.
Watuhumiwa wote wanashikiliwa na Jeshi la Polisi Mkoa wa Mbeya na watafikishwa Mahakamani mara baada ya upelelezi kukamilika.

Katika hatua nyingine, Jeshi la Polisi Mkoa wa Mbeya linaendelea kupambana na wahalifu wanaojihusisha na dawa za kulevya. 
Kutokana na taarifa za kiintelijensia mnamo tarehe 11.04.2018 majira ya saa 17:00 jioni tuliweza kubaini kuwa huko maeneo ya Mlima James, Kiwanja kilichopimwa Plot Na.2590 Kitalu X Mwakibete, Kata ya Ilemi, Tarafa ya Sisimba, jiji na Mkoa wa Mbeya kuwa kuna wakulima ambao wanalima mazao mbalimbali kwa kuchanganya na miche ya Bhangi ipatayo 83.

Miche hiyo iling’olewa na wananchi wa eneo hilo kwa kushirikiana na viongozi wao wa Serikali za Mitaa chini ya usimamizi mkali wa Jeshi la Polisi. Jitihada za kumtafuta mhalifu wa tukio hili zinaendelea.

WITO:
Kamanda wa Polisi Mkoa wa Mbeya Kamishina Msaidizi wa Polisi MUSSA A. TAIBU anatoa wito kwa jamii kuachana na tamaa ya mali hasa kwa kujihusisha na vitendo vya kihalifu ili wapate mali na badala yake wafanye kazi halali. 
Aidha Kamanda TAIBU anaendelea kutoa wito kwa wananchi kutoa taarifa kwa Jeshi la Polisi ili hatua stahiki ziweze kuchukulia dhidi ya wahalifu. 
Pia Kamanda TAIBU anawasihi wananchi wa Mkoa wa Mbeya na Wilaya zake kuachana na tabia ya kilimo cha Bhangi kwani watakaokamatwa watahusika wenyewe katika kuteketeza mashamba hayo lakini pia sheria kali itachukuliwa dhidi yao.


Wednesday, April 18, 2018

Serikali Kuajiri Walimu 6,000 June

Ofisi ya Rais, Tawala za Mikoa na Serikali za Mitaa (Tamisemi), imesema hadi kufikia Juni 30 mwaka huu inatarajia kuajiri walimu 6,000 wa masomo ya Hisabati na Sayansi kwa ajili ya shule za sekondari nchini.

Kauli hiyo ilitolewa jana bungeni na Naibu Waziri, Ofisi ya Rais (Tamisemi), Joseph Kakunda, alipokuwa akijibu swali la nyongeza la Mbunge wa Mchinga (CUF), Hamidu Bobali, ambaye alitaka kujua mikakati ya serikali katika kuondoa changamoto katika shule za kata ikiwamo upunguzu wa walimu wa Hisabati na Sayansi.

Pia, Bobali alitaka kujua msimamo wa serikali kuhusu wananchi kuchangia kwenye chakula ambacho wameona ndio chachu ya kuongeza ufaulu kwa wanafunzi katika Mkoa wa Lindi. Alisema hadi Desemba mwaka 2017, Serikali ilikuwa imeajiri walimu 200 wa Hisabati na Sayansi kwa ajili ya shule za sekondari.

Kadhalika, alisema serikali haijazuia wananchi kuchangia maendeleo ya shule walichokataza ni kumzuia kumpa adha ya kukosa masomo mwanafunzi ambaye ameshindwa kuchangia michango hiyo.

Katika swali la msingi, Mbunge huyo alitaka kujua kama serikali imefanya tathmini juu ya ubora na changamoto zilizopo katika shule za sekondari za kata nchini.

Akijibu Kakunda alisema hadi Oktoba 2017, Shule za kata 3,103 zilikuwa na wanafunzi 197,663 ambao kama zisinge kuwepo wangeikosa elimu ya sekondari.

Kakunda alisema maamuzi ya kuanzishwa kwa shule ya sekondari kila kata ili kuhakikisha watoto wengi zaidi waliokuwa wanakosa nafasi za masomo ya sekondari licha ya kufaulu mitihani ya darasa la saba kwa sababu tu ya uchache wa shule wanapata nafasi hizo.

Alisema tathmini mbili za serikali zilizochambua kwa kina sekta ya Elimu kupitia Tume ya Prof. Mchome ya mwaka 2013, iliyochambua sababu za ufaulu hafifu wa wanafunzi kwenye mitihani ya mwaka 2012 na kamati ya kuhuisha na kuoanisha sera ya Elimu na Mafunzo ya mwaka 1995, Sera ya Elimu ya Ufundi na Mafunzo ya mwaka 1996.

Pia alisema sera ya Taifa ya Elimu ya juu ya mwaka 1999 na Sera ya Teknolojia ya Habari na Mawasiliano kwa elimu ya msingi ya mwaka 2007, iliyoongozwa na Mwalimu Abubakar Rajab mwaka 2013, ndizo zilizobaini na kuishauri serikali kuanzisha sera mpya moja ya Elimu na Mafunzo ya mwaka 2014.

“Sera mpya imetoa maelekezo mahususi kuhusu namna ya kuboresha elimu ya awali, msingi, sekondari, elimu ya ufundi na elimu ya juu na mitaala imesharekebishwa, ikama, vifaa, samani na miundombinu vyote vinaendelea kuboreshwa,” alisema.